Фальклорнае свята "Святло Каляднай зоркі"
Прыйшла Каляда,
Дзверы адчыняйце!
Калядоўшчыкаў у хату
Шчыра запрашайце!
Выхаванцы і педагогі нашай установы на гэтым тыдні змаглі далучыцца да скарбаў нацыянальнай культуры, акунуцца ў атмасферу выдатнага і чароўнага зімовага свята - "Каляды".
Да дзяцей старшай групы завiталi калядоўшчыкi з Калядная зоркай і пажаданнямi шчасця, прыбытку, здароўя. Падчас мерапрыемства хлопчыкі і дзяўчынкі даведаліся, адкуль прыйшло свята, як адзначалі яго бабулі і дзядулі. Галоўныя персанажы свята - Варона, Мядзведзь, Баба Яга - разам з маленькімі калядоўшчыкамі весялілі дашкалят цікавымі народнымі гульнямі, конкурсамі і забавамі. Не абышлося на гэты раз і без свавольстваў. Баба Яга прапанавала "палятаць" на мятле, але дзеці не разгубіліся, аказаліся спрытнымі і адважнымі.
На працягу ўсяго мерапрыемства гучалі абрадавыя песні, заклічкі. Прысутныя змаглі адчуць прыгажосць, мілагучнасць роднай мовы, а таксама павадзіць карагоды вакол прыгажуні-ёлкі, зрабіць фотаздымкі ля казачнай фотазоны. Не абышлося свята і без пачастункаў каляднымі прысмакамі.
Цудоўнае свята даставіла шмат радасці і добрага настрою, усмешак і запалу на цэлы год!
