На Вялікдзень звон гудзе!
У нашай установе адукацыі вялікая ўвага надаецца выхаванню ў дзяцей любові да Радзімы, яе культурных традыцый. З гэтай мэтай педагогі знаёмяць выхаванцаў з гісторыяй Беларусі, культурнай спадчынай беларускага народа, традыцыйнымі народнымі звычаямі. Свята святаў і ўрачыстасць урачыстасцей - так называюць людзі Вялікдзень.
Падчас правядзення музычнай забавы "На Вялікдзень звон гудзе" знаемілі выхаванцаў з традыцыямі і сімваламі свята. Свята, напоўненае народнай музыкай, народнымі песнямі, танцамі, выпраменьвала цяпло і святло. Дзеці расказвалі вершы, спявалі песні, гулялі на музычных інструментах. Святкаванне Вялікадня не абышлося без рухомых гульняў. Спаборнічаючы ў хуткасці і спрыту, дзеці гулялі ў беларускія народныя гульні "Перанясі яйка ў лыжцы", "Біткі", каталі яйкі (у каго далей пракоціцца), раскручвалі іх (у каго даўжэй пракруціцца), а хто найхутчэй пасля заканчэння музыкі схопіць яйка, той будзе цэлы год шчаслівым. Упрыгожваннем мерапрыемства стала гульня-інсцэніроўка ў выкананні дзяцей у яркіх, арыгінальных касцюмах куранят і пеўнікаў.
Па традыцыі свята скончылася пачастункам – велікодным кулічом.
Фотасправаздачу Вы можаце паглядзець тут.
