Па турыстычных сцежках г.Ліды
Знаёмства выхаванцаў з мясцінамі, дзе яны жывуць, узбагачае веды, развівае цікаўнасць, садзейнічае выхаванню пачуцця гонару за родны край. Дзеці ўсведамляюць, што іх горад – частка Радзімы, кожнае месца непаўторнае па сваей прыгажосці і гістарычных падзеях. Выхаванне патрыёта сваёй Радзімы – адказная і складаная задача, вырашэнне якой у дашкольным дзяцінстве толькі пачынаецца.
Выхавацель дашкольнай адукацыі Літавар Лілія Пятроўна знаёміць выхаванцаў групы "Жамчужынкі" з малой радзімай праз рэалізацыю інфармацыйна-творчага праекта "Славутасці горада Ліды" (квэсты, гульню "Клуб знаўцаў Ліды", фотарэпартажы, тэатральныя хвілінкі, буклеты "А вы там былі?", сюжэтна-ролевую гульню "Лідскае тэлерадыёаб’яднанне", мультымедыйную прэзентацыю "Падарожжа па горадзе Лідзе", складанне фотаальбома "Горад Ліда – мая маленькая радзіма" і інш.).
Лілія Пятроўна для сваіх выхаванцаў часта арганізоўвае экскурсіі, мэтавыя прагулкі, у ходзе якіх дзеці знаёмяцца з гісторыяй свайго горада, атрымліваюць звесткі аб мінулым і сучасным горада. Так, у час падарожжа па вуліцы Савецкай дзеці атрымалі цікавыя звесткі пра гістарычны помнік – Фарны касцел, дапоўнілі свае веды пра беларускага першадрукара Францыска Скарыну, разглядзелі знешні выгляд сучаснай пабудовы – гасцініцы "Ліда", затрымаліся каля іранічнай скульптуры "Камандзіровачны", дакрануліся да масіўнага валуна, устаноўленага ў гонар заснавання горада.
Звесткі, атрыманыя ў ходзе экскурсіі, фотаздымкі, паштоўкі з выявамі роднага горада, ілюстрацыі кніг далі магчымасць арганізаваць у групе сюжэтна-ролевую гульню "Школа", з задавальненнем адказаць на пытанні "настаўніцы" па тэме "Мой горад".
Фотасправаздачу аб экскурсіі Вы можаце паглядзець тут.
